ಕೇರಳ ರಾಜ್ಯದ ಹೆಸರು ಅಧಿಕೃತವಾಗಿ ‘ಕೇರಳಂ’ ಎಂದು ಬದಲಾವಣೆ

ಕೇರಳ ರಾಜ್ಯ ಅಧಿಕೃತವಾಗಿ ಕೇರಳಂ ಎಂದು ಬದಲಾಗಿದ್ದು, ಆ ಕುರಿತು ಕೇಂದ್ರ ಗೃಹ ಸಚಿವಾಲಯ ಅಧಿಸೂಚನೆ ಹೊರಡಿಸಿದೆ.

ನಿನ್ನೆಯಿಂದ ಜಾರಿಗೆ ಬರುವಂತೆ ಕೇರಳಂ ಎಂದು ಹೆಸರು ಬದಲಾವಣೆಯಾಗಿದೆ.

ಕೇರಳ ಮರು ನಾಮಕರಣ ಮಸೂದೆಯನ್ನು ಲೋಕಸಭೆ ಆಗಸ್ಟ್ 11ರಂದು, ರಾಜ್ಯಸಭೆ ಆಗಸ್ಟ್ 12ರಂದು ಅಂಗೀಕರಿಸಿತ್ತು. ಆನಂತರ, ರಾಷ್ಟ್ರಪತಿ ದ್ರೌಪದಿ ಮುರ್ಮು ಮಸೂದೆಗೆ ಅಂಕಿತ ಹಾಕಿದ್ದರಿಂದ ಕೇರಳ ಹೆಸರು, ಕೇರಳಂ ಎಂದು ಬದಲಾಗಿದ್ದು, ಆ ಕುರಿತ ಶಾಸನ ಜಾರಿಗೆ ಬಂದಿದೆ.

ಕೇರಳ ರಾಜ್ಯದ ಹೆಸರನ್ನು ‘ಕೇರಳ’ದಿಂದ ‘ಕೇರಳಂ’ಗೆ ಬದಲಾಯಿಸುವ ಪ್ರಸ್ತಾವನೆಗೆ ಕೇಂದ್ರ ಸಚಿವ ಸಂಪುಟವು 2026ರ ಫೆಬ್ರವರಿ 24ರಂದು ಅನುಮೋದನೆ ನೀಡಿತ್ತು. ಈ ಪ್ರಸ್ತಾವನೆಗೆ ಸಂವಿಧಾನದ ಅನುಚ್ಛೇದ 3 ಅಡಿಯಲ್ಲಿ ಮುಂದಿನ ಶಾಸನಾತ್ಮಕ ಪ್ರಕ್ರಿಯೆ ಕೈಗೊಳ್ಳಲು ಕೇಂದ್ರ ಸರ್ಕಾರ ಮುಂದಾಗಿತ್ತು.

ಕೇರಳಂ’ ಹೆಸರಿನ ಮಹತ್ವ

ಕೇಂದ್ರ ಗೃಹ ಸಚಿವಾಲಯದ ಅಧಿಕೃತ ಪ್ರಕಟಣೆಯ ಪ್ರಕಾರ, ‘ಕೇರಳಂ’ ಎಂಬ ಹೆಸರು ರಾಜ್ಯದ ಭಾಷಾ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಹೆಚ್ಚು ಅಧಿಕೃತವಾಗಿ ಪ್ರತಿಬಿಂಬಿಸುತ್ತದೆ ಎಂಬ ಅಭಿಪ್ರಾಯವನ್ನು ಕೇಂದ್ರ ಗೃಹ ಸಚಿವ ಅಮಿತ್ ಶಾ ವ್ಯಕ್ತಪಡಿಸಿದ್ದರು. ಅವರು ಹೆಸರಿನ ಬದಲಾವಣೆಯನ್ನು ರಾಜ್ಯದ ಜನರ ದೀರ್ಘಕಾಲದ ಬೇಡಿಕೆಯನ್ನು ಈಡೇರಿಸುವ ಪ್ರಮುಖ ಹೆಜ್ಜೆ ಎಂದು ವಿವರಿಸಿದ್ದರು.

ಕೇರಳ ವಿಧಾನಸಭೆಯ 2024ರ ನಿರ್ಣಯದಲ್ಲೂ ಭಾಷಾ ಆಧಾರದ ಮೇಲೆ ರಾಜ್ಯಗಳ ರಚನೆ, 1956ರ ನವೆಂಬರ್ 1ರಂದು ರಾಜ್ಯಗಳ ರಚನೆ ಹಾಗೂ ಮಲಯಾಳಂ ಮಾತನಾಡುವ ಜನರಿಗೆ ಏಕೀಕೃತ ಕೇರಳದ ಬೇಡಿಕೆಯ ಹಿನ್ನೆಲೆಯನ್ನು ಉಲ್ಲೇಖಿಸಲಾಗಿದೆ.

ಸರಳವಾಗಿ ಹೇಳುವುದಾದರೆ

‘ಕೇರಳಂ’ ಎಂಬುದು ಮಲಯಾಳಂನಲ್ಲಿ ರಾಜ್ಯದ ಹೆಸರು. ‘ಕೇರಳ’ ಎಂಬ ಹೆಸರಿನ ಬದಲಾಗಿ ‘ಕೇರಳಂ’ ಅನ್ನು ಅಧಿಕೃತ ರಾಜ್ಯನಾಮವನ್ನಾಗಿ ಮಾಡುವ ಪ್ರಕ್ರಿಯೆ ಕೇರಳ ವಿಧಾನಸಭೆಯ ನಿರ್ಣಯದಿಂದ ಆರಂಭವಾಗಿ, ಕೇಂದ್ರ ಸಚಿವ ಸಂಪುಟದ ಅನುಮೋದನೆಯ ಹಂತವನ್ನು ತಲುಪಿತ್ತು.